فوتو: اشىق دەرەككوز
جۋىردا دەنساۋلىق ساقتاۋ مينيسترلىگى جاڭا سالىق كودەكسى شەڭبەرىندە دارىلىك زاتتار مەن مەديتسينالىق بۇيىمدار سالاسىندا قوسىلعان قۇن سالىعىن قولدانۋ ءتارتىبىن ءتۇسىندىردى. ققس-تان بوساتۋ شارالارى دارىلىك زاتتاردىڭ 3 000-نان استام اتاۋىن قامتيدى. ونىڭ ىشىندە 1200-دەن استام پرەپارات ورفاندىق جانە الەۋمەتتىك ءمانى بار اۋرۋلاردى ەمدەۋگە ارنالعان. تىزىمدەگى دارىلىك زاتتار وتكىزۋ ارناسىنا قاراماستان اينالىمنىڭ بارلىق كەزەڭدەرىندە ونىڭ ىشىندە كوتەرمە جانە بولشەك ساۋدادا وتكىزۋدى قوسا العاندا, ققس-تان بوساتىلادى. سونداي-اق ورفاندىق جانە الەۋمەتتىك ءمانى بار اۋرۋلاردى ەمدەۋ, دياگنوستيكالاۋ, الدىن الۋ جانە وڭالتۋ بويىنشا مەديتسينالىق قىزمەتتەرگە ققس سالىنبايدى. تمككك جانە ءمامس شەڭبەرىندە دارىلىك زاتتاردى ءوندىرۋ ءۇشىن پايدالانىلاتىن يمپورتتالاتىن فارماتسەۆتيكالىق سۋبستانتسيالار ققس-تان بوساتىلادى.
مەديتسينا, ارحەولوگيا جانە باسپا ونىمدەرى ققس-تان بوساتىلادى
بۇل تۋرالى دەنساۋلىق ساقتاۋ مينيسترلىگى مەديتسينالىق جانە فارماتسەۆتيكالىق باقىلاۋ كوميتەتىنىڭ توراعاسى باۋىرجان ءجۇسىپوۆ بىلاي دەپ پىكىر ءبىلدىردى:
«جاڭا سالىق كودەكسىنە سايكەس, دارىلىك زاتتار مەن مەديتسينالىق بۇيىمدار كوتەرمە جانە بولشەك ساۋدا سەگمەنتتەرىندە ققس-ىن تومەندەتىلگەن مولشەرلەمەمەن قولدانۋ كوزدەلگەن. ياعني, بيىل قاڭتاردان ققس ءدارى-دارمەك ءۇشىن 5% قۇرايدى. ال 2027 جىلى قاڭتاردان 10 % بولادى. سونىمەن قاتار كەدەندىك اكىمشىلەندىرۋ كەزىندە جەتكىزىلەتىن ءدارى-دارمەكتەردىڭ نىسانالى ماقساتىن راستاۋدى ۇسىنۋ مىندەتتىلىگىنە قاتىستى ماسەلەلەر تۋىندايتىنىن ايتا كەتكەن ءجون. ۇكىمەتتىڭ 2025 جىلى جەلتوقساندا بەكىتكەن قاۋلىسىنا سايكەس, دارىلىك زاتتاردى يمپورتتاۋ كەزىندە مىندەتتى شارتتار قولدانىلادى. وسىلاردى تۇگەندەسەم, ءبىرىنشى فارماتسەۆتيكالىق قىزمەتكە نەمەسە مەديتسينالىق قىزمەتكە ليتسەنزيانىڭ بولۋى, جەتكىزۋ شارتىنىڭ بولۋى قاجەت. وسىعان قوسا, جەتكىزۋشىنىڭ تاۋارلاردى نىسانالى پايدالانۋ تۋرالى مىندەتتەمەسى كەرەك. تىركەلگەن دارىلىك زاتتاردى يمپورتتاۋ كەزىندە ەل اۋماعىندا مەملەكەتتىك تىركەۋدىڭ بولۋى شارت. ال تىركەلمەگەن دارىلىك زاتتاردى يمپورتتاعان جاعدايدا دەنساۋلىق ساقتاۋ مينيسترلىگىنىڭ بۇيرىعىنا سايكەس, بەرىلگەن رۇقسات قۇجاتى ۇسىنىلادى», دەپ قورىتتى باۋىرجان ءجۇسىپوۆ.
ءدارى-دارمەكتەر مەن مەديتسينالىق قىزمەتتەردىڭ تىزبەسى ققس-تان بوساتىلدى
